Hörður Geirsson fjallar um verkefni við að nafngreina óþekkt fólk á ljósmyndum Önnu Schiöth með aðstoð gervigreindar
Sæl,
nú boðum við til hittings/fyrirlesturs, miðvikudaginn 7. maí nk. kl. 19:00. Staðurinn er VMA (gengið inn að vestan).
Efni hittingsins er algerlega í anda þess sem er að gerast í ljósmyndaheiminum í dag, í senn spennandi og áhugaverður:
Andlitsgreining mannamynda með gervigreind
Fyrirlestur Harðar Geirssonar, safnvarðar Ljósmyndadeildar Minjasafnsins á Akureyri
Í fyrirlestrinum verður fjallað um verkefni sem fólst í að safna saman ljósmyndum Önnu Schiöth ljósmyndara á Akureyri úr flestum söfnum landsins og að láta síðan gervigreind hjálpa við að nafngreina óþekkta einstaklinga á ljósmyndunum.
Anna Schiöth f. Larsen var ljósmyndari Akureyringa í 20 ár frá 1878 til 1898, og myndaði mjög marga Norðlendinga sem áttu leið um Akureyri þessa áratugi. Myndir hennar hafa varðveist vel sökum þess að hún hafði ljósmyndatæknina á sínu valdi, notaði góð efni og var vandvirk. Síðustu rúm 20 ár ævinnar helgaði hún Lystigarðinum á Akureyri.
Fyrirlesturinn er hluti af viðburðaröð AkureyrarAkademíunnar á þessu ári.
Meðfylgjandi mynd er búin til af gervigreind (ChatGPT).
